भिऊ नकोस [घाबरण्यासारखे काहीही नाही], कारण मी तुझ्याबरोबर आहे; भीतीमुळे इकडे-तिकडे पाहू नकोस आणि हताश होऊ नकोस, कारण मी तुझा देव आहे…

या बाबतीत देवाचे वचन स्पष्ट आहे: आपण भीती बाळगू नये. लक्षात घ्या, देव असे म्हणत नाही की आपल्याला कधीच भीती वाटू नये; पण तो हे नक्कीच सांगतो की, आपण भीतीला आपल्यावर नियंत्रण मिळवू देऊ नये किंवा तिने आपले भविष्य हिरावून घेऊ देऊ नये.

हे लक्षात ठेवणे महत्त्वाचे आहे की, ज्या गोष्टी आपण अंधारात लपवून ठेवतो, त्यातून मुक्त व्हायचे असेल तर त्या प्रकाशात आणणे गरजेचे असते. एखाद्या पूर्णपणे अंधाऱ्या खोलीत जा आणि दिवा लावा. काय घडते? अंधार नाहीसा होतो. आपल्या जीवनात देव आणि त्याचे वचन अशाच प्रकारे कार्य करतात. जेव्हा आपण देवाच्या वचनानुसार वागतो, तेव्हा आपल्याला सतावण्याचा प्रयत्न करणाऱ्या भीती नाहीशा होतात. त्या निघून जातात आणि त्यांचे आपल्यावर कोणतेही वर्चस्व राहत नाही.

माझी अशी मनापासून इच्छा आहे की, माझ्याकडे एखादी जादूची कांडी असती किंवा एखादी प्रार्थना असती, जिच्याद्वारे तुमच्या आयुष्यातील भीती कायमची नाहीशी करता आली असती. दुर्दैवाने, तसे घडणार नाही. भीतीचा सामना करण्याचे सामर्थ्य प्रार्थना आपल्याला नक्कीच देते; परंतु देवाला अपेक्षित असल्याप्रमाणे भीतीवर मात करून विजयी होण्यासाठी, आपल्याला हे समजून घेणे आवश्यक आहे की आपण “भीती वाटत असूनही ती कृती करू शकतो” आणि तेव्हाच आपण मुक्त होऊ.

हे प्रभू, मी आता तुझ्यासमोर जी भीती घेऊन आलो आहे, तिचा सामना करण्यासाठी तुझ्या वचनाचे सामर्थ्य प्रभावी ठरो. मला अशी सत्ये दाखव जी माझ्या आत्म्याला मुक्त करतील. आमेन.