“तेव्हा तुम्ही निरोगी व्हावे म्हणून आपली पातके एकमेकांजवळ कबूल करून एकमेकांसाठी प्रार्थना करा. नीतिमानाची प्रार्थना कार्य करण्यात फार प्रबळ असते.”
प्रार्थनेबद्दल मला जर एकच गोष्ट अधोरेखित करायची असेल, तर ती ही की, प्रार्थना करणे आणि आपण विचार करतो त्यापेक्षा कितीतरी अधिक सोपे आहे. सुदैवाने, प्रार्थना करण्याच्या प्रक्रियेला क्लिष्ट केलेले नाही; ती खरोखरच अत्यंत साधी आहे. कधीकधी लोक प्रार्थनेला नीरस आणि कठीण बनवतात; तर कधीकधी आपली धार्मिक मानसिकता किंवा विविध ‘प्रणाली’ प्रार्थनेला अशा प्रकारे मांडतात की, ती आपल्यापैकी अनेकांसाठी आवाक्याबाहेरची वाटते.
मी तुम्हाला खात्रीपूर्वक सांगतो की, देवाची इच्छा अशी आहे की आपले प्रार्थनाजीवन नैसर्गिक आणि आनंददायी असावे. देवाला हवे आहे की, आपल्या प्रार्थना प्रामाणिक आणि मनापासून असाव्यात. त्याच्याशी होणारा आपला संवाद कोणत्याही कडक नियमांच्या, बंधनांच्या, कर्तव्यांच्या किंवा कायदेशीर चौकटींच्या ओझ्याखाली नसावा, अशी त्याची इच्छा आहे. देवाला अपेक्षित आहे की, प्रार्थना आपल्या दैनंदिन जीवनाचा एक अविभाज्य भाग असावी—एवढी सहज, जणू काही ती आपल्या रोजच्या आयुष्यातील सर्वात सोपी गोष्ट असावी.
हे परमपित्या, मी तुझे आभार मानतो की, मी तुझ्याशी अगदी नैसर्गिकपणे आणि प्रामाणिकपणे बोलू शकतो. एका मित्राप्रमाणे मी तुझ्याशी संवाद साधू शकतो आणि मला खात्री असते की, जेव्हा मला तुझी गरज असते, तेव्हा तू सदैव माझ्यासोबत असतोस. आमेन