म्हणून विश्वास ऐकण्याने येतो आणि ऐकणे देवाच्या वचनाने येते.
हे समजून घेणे महत्त्वाचे आहे की, जोपर्यंत तुम्ही तुमचा विश्वास प्रत्यक्षात आणत नाही किंवा वापरत नाही, तोपर्यंत तो कार्य करू शकत नाही. केवळ विश्वास असण्याने काहीही साध्य होत नाही. तुमच्या बँकेत पैसे असूनही तुम्ही उपासमारीने मरू शकता. फ्रीजमध्ये अन्न असूनही तुम्ही उपाशी राहू शकता. कपाटात कोट असूनही तुम्ही बाहेर थंडीत कुडकुडू शकता.
एखादी गोष्ट जवळ असणे म्हणजे तिचा वापर केलाच जाईल याची हमी नसते. त्याचप्रमाणे, तुमचा विश्वास कार्यन्वित करण्यासाठी तुम्हाला त्याचा वापर करावा लागेल!
मग, तुम्ही तुमचा विश्वास कसा प्रत्यक्षात आणाल? पहिले म्हणजे, देवाच्या वचनातील वचनांनुसार (प्रतिज्ञांनुसार) प्रार्थना करा. दुसरे म्हणजे, देवाचे वचन जे सांगते तेच बोला. आणि तिसरे म्हणजे, देवाच्या वचनावर आधारित देव तुम्हाला जे करायला सांगत आहे असे तुम्हाला वाटते, ते करा.
प्रार्थना करा, बोला आणि कृती करा. तुम्ही देवावर आणि त्याच्या वचनावर जितके जास्त अवलंबून राहाल, तितका स्वतःवरील ताण कमी होईल. विश्वास तुम्हाला देवावर भरवसा ठेवण्याचे सामर्थ्य देतो.
ख्रिस्ताने तुमच्यासाठी जे काही केले आहे—एक भेट म्हणून—त्यामुळेच तुम्ही विश्वासाने जगू शकता, तुमचा विश्वास प्रत्यक्षात आणू शकता आणि त्याने तुमच्यासाठी ठेवलेल्या सर्व गोष्टींचा अनुभव घेऊ शकता.
देवा, मी स्वतःला तुझ्या स्वाधीन करतो. जेव्हा मी स्वतःच्या बळावर काही करण्याचा प्रयत्न करतो, तेव्हा काहीच साध्य होत नाही. मला तुझी गरज आहे. तुझ्यावर अधिक विश्वास ठेवण्यासाठी माझा विश्वास वाढव. माझ्या विश्वासाच्या बाबतीत मला प्रार्थना करायची आहे, बोलायचे आहे आणि कृती करायची आहे; आमेन.